hambergen.de

De Gemeen Holste (Hellingst-Helljes; Oldendorf-Ollendörp, Steden-Steern)

Keeneen von de 3 Dörper Helljes, Ollendörp un Steern wull bi de Gebietsreform in de Mitt´ von de söbentiger Johren sienen Nomen upgeven. So hett man eenen künstlichen Nomen erfunnen, de sick ut alle 3 Oorte tosomensett: ut Hellingst/Helljes dat H, von Oldendorf/Ollendörp de Bookstoben OL un von Steden/Steern STE. Man mutt sick wunnern, wi gau un goot sick düsse nee´e Nomen inbörgert hett. In alle 3 Oortschaften leevt bieenanner 1.300 Inwohner, de sick up een Flaag von 35 Quadrotkilometer verdeelt. Dat bedüüdt, up eenen Quadrotkilometer leevt 26 Lüüd. Düsse Tall alleen wiest all up den landwirtschaftlichen Charakter von de Gemeen hen. In de Dörpsmitt´ von Helljes, Ollendörp un Paddewisch, siet 1928 mit Steern tosomenleggt, sünd dat de "Groten Höfe", de eenen toeerst in´t Oogt fallt. Im Loop von de letzten Johrteinte kemen an´ne Kant lütte Wohnhüüs dorto. Arbeit findt allerdings de wenigsten Holster in ehre Gemeen. Veele sünd "Pendler" un goot ehre Arbeit in Bremen, Bremerhoben oder Osterholt-Scharmbeck no.

För de Beteknung "Schwarze Dörfer- (Swatte Dörper)" mit de Holste siet lange Tieden leevt, giff dat eenige Düdungen. Dat is wull antonehmen, dat de Ursprung dorin to finnen is, datt man in de Oorte Holtköhlen herstellte un sülbens ut Törf Schmedeköhlen fardigte. Dat giff Bewiese doröber, dat im Paddewischer Deel von´t Springmoor Törfköhlen un in´ ne Els Holtköhlen herstellt worrn. So is denn de Beteknung "Schwarze Dörfer" för Holste as ehrfull antosehn, wiest se doch up düsse ole Tradition hen.

Im Loop von de trüchlingenden twee Johrhunnerte plante man in Steern un Paddewisch, wo meist bloot Heide stünn, no un no Fichten un Kiefern an. Wo jümmer de Möglichkeit dor weer, worr Ackerland urboor mookt. Mehr as dat Halfpart von Steern besteiht hüüte ut Wald. Een See, den man sülbens anleggt hett, ward bi Sünnenschien von dusenden von Minschen besöcht. Ok ´n Barg Lüüd, de sick hier up Duur wohlföhlt, hebbt düsse Möglichkeit up den Campingplatz un sorgt so för reget Drieben in Holste.

De Nomen Holste is in´n ganzen Kreis ok dör eenen Vörgeschichtspadd nomhaft worrn. De informative, wunnerschöne Streck, föhrte vörbi an veele Reliquien ut ole Tieden. De Landkreis Osterholt hett tosomen mit dat Lannesverwaltungsamt ut Neddersassen im Johr 1976 för düsse Inrichtung sorgt. De utschilderte Weg geiht vörbi an een Graff ut de Jungsteentied. Bi Utgrabungen hett man dat 1868 funnen. Wieterhen is een Schalensteen to sehn, den man in de Helljer Feldmark funn. Up düssen Steen worr den Göttern wull Opfergaaven dorbröcht. De Graffen un Fundsteden up den Vörgeschichtspadd hett man in eene ole Sandkuhl ergänzt un nobaut, um dat öbersichtlicher to moken.

Wi stolt de Holster up ehre Geschichte sünd, bewiest de örtlichen Vereene. De Helljer Schützen dreegt eene ole Köhlerhütten as Teknung in ehr Wappen, un de Steerner Schützen hebbt de Umrisse von eenen olen Steengroben in ehre Vereensfohne.

Ok wenn de Bigaaven to de entdeckten fröhgeschichtlichen Graffen dorup sluten loot, dat Holste all fröh besiedelt weer, liggt de eerste urkundliche Erwähnung nich wiet trüch. Eene eerste vullstännige Beschrievung von de Hoffsteden findt man im "Vörder Register". Dütt hett de Bremer Erzbischop Johannes Rohde as eene Bestandsupnohme von jedet Goot im Johr 1500 anleggt. För "Stedenn" sünd de Vullhöfner Wilkens, Muller un Greuere sowie een halve Hoff un eene Katen upföhrt, in "Hellingkstede" dree Vullhöfe (Witbalke, Bullenwinkell un Welingen) sowie dree Halvhöfe un eene Katen un in "Oldendorppe" dree Vullhöfe (Bolte, Bolte un Wittepenninck) un een Deelhoff. In "Paddewysck" ward de Vullhoff von Johann tore Paddewysck benömt.